Цаг агаарын урьдчилсан мэдээгээр хэт халуун бөгчим өдрүүд үргэлжлэх тул эцэг, эх асран хамгаалагчдад наршилтаас сэргийлэх дараахи зөвлөмж, сэрэмжлүүлгийг хүргэж байна.

Нарнаас хамгаалах малгай, шүхэр хэрэглэлгүй удаан хугацаагаар гадаа байснаас бие хямарч, хордлогын шинж тэмдэг илэрдэг.

Иймд:

1. Бага насны хүүхдийг онцын шаардлагагүй бол гадуур авч явахгүй байх; (Наранд аль болох бага явах)
2. Нарны шууд тусгалаас хамгаалах нүдний шил, малгай зэргийг тогтмол хэрэглэх;
3. Гар, хөл, хүзүү зэргийг наранд ил гаргах хэрэггүй. Учир нь зөвхөн толгойноосоо халснаар наршдаггүй, нарны тусгалыг шууд хүлээн авч байгаа биеийн бусад хэсгүүдээр ч наршиж болно. Тиймээс хэт халуун өдөр майк, богино ханцуйтай цамц өмсөх биш урт ханцуйтай нимгэн цамц өмсөх;
4. Нярай хүүхдийг гадаа байлгахдаа сүүдрэвчинд байлгаж, чийглэг сэрүүн орчин бүрдүүлэх;
5. Наранд удаан хугацаанд байх шаардлага гарвал аль болох битүү хувцас өмсөөд толгойгоо ойр ойрхон норгох буюу нойтон алчуур, малгай хэрэглэх;
6. Шингэнийг аль болох олон хэлбэрээр (буцалгаж ширгээсэн ус, хөргөсөн цай, жимсний шүүс, хярам) ойр ойрхон уух;
7. Хэт хөлдөөсөн зайрмаг, мөс, хэт хүйтэн ус, ундаа уух нь хоолой өвдөх нөхцөлийг бүрдүүлдэг тул эцэг эхчүүд анхаарах.
8. Хэрвээ  наршилтын  шинж тэмдэг илэрвэл Сум, Өрхийн эрүүл мэндийн төвдөө хандах хэрэгтэй. 
9. Цаг алдаж болохгүй. Бага насны хүүхэд амархан хүндэрдэг гэдгийг санаж, халамж анхаарлаа бууруулж болохгүй байхыг тус тус зөвлөж байна.     

1. НАРШИЛТЫН ҮЕД ИЛРЭХ ШИНЖ ТЭМДЭГ, АВАХ АРГА ХЭМЖЭЭ

Илрэх шинж тэмдэг:

Нууц үе 30 минутаас 18 цаг;

Дотор бачуурч, бие нозоорох;

Дотор муухайрах, бөөлжих, суулгах;

Бага зэрэг халуурах;

Ходоод гэдэсний хэвийн ажиллагаа хямрах;

Нүд харанхуйлж, толгой эргэх.

Авах арга хэмжээ:

Дээрх шинж тэмдэг илэрвэл эмчид яаралтай хандан үзүүлж зөвлөгөө авах;

Буцалсан усыг хөргөөн задгай саванд хийж наранд халаагаад уг усаа уух буюу толгой биеийг угааж хэвших;

Зөв тохирсон шингэнийг насны онцлогт тохируулан аль болох ойрхон олон удаа хэрэглэх;

Нарнаас хамгаалж гэртээ чийгтэй сэрүүн орчин бүрдүүлэх;

Хэрэв халуурвал хүйтэн жинг толгой, шилэн хүзүү орчимд тавьж халуунаа бууруулах;

Хоол унд хорихгүй учраас шим тэжээлтэй хоол идэх нь зүйтэй

Хэн үүнд өртөх вэ?

Бүх насны хүмүүс өртөх боломжтой;

Бага насны хүүхэд, артерийн даралт ихэсдэг, зүрх судасны эмгэгтэй болон хууч өвчтэй, өндөр настай иргэд илүү их өртөх магадлалтай.